کلمہ توحید کے اقرار میں سارے اجزائے دین کے شامل ہونے کی مثال

ملفوظاتِ حکیم الامت مجدد الملت حضرت مولانا محمد اشرف علی تھانوی رحمۃ اللہ علیہ

ارشاد فرمایا کہ لا الہ الا اللہ ایک عنوان ہے جو تمام اجزائے دین کو شامل ہے۔ نماز، روزہ، حج، زکوۃ، معاملات، معاشرت، اخلاق، فرائض اور مستحبات سب اس میں آگئے۔ اس کی موٹی مثال ایسی ہے جیسے نکاح میں صرف ایجاب و قبول ہوتا ہے۔ فرض کیجئے کہ کسی نے نکاح کیا، پھر چند روز کے بعد بی بی صاحبہ نے نان و نفقہ کا مطالبہ کیا اور آٹے دال کا تقاضا کیا اور رہنے کو گھر مانگا تو کیا دولہا میاں یہ کہہ سکتے ہیں کہ واہ میں نے تو تمہیں قبول کیا تھا، اس آٹے دال گھر گھرستی کو کب قبول کیا تھا۔ اگر کوئی ایسا کہے تو اس پر سب ہنسیں گے اور اس کو بے وقوف بتائیں گے اور یہی جواب دیں گے کہ میاں تم نے جو نکاح میں یہ کہا تھا کہ میں نے تجھ کو قبول کیا، اس میں سب کچھ آگیا، نان نفقہ بھی، گھر گھرستی بھی، نمک، تیل، لکڑی بھی۔

نوٹ:- یہ ملفوظات ڈاکٹر فیصل صاحب (خلیفہ شیخ الحدیث حضرت مولانا عبدالمتین بن حسین شاہ صاحب دامت برکاتہم العالیہ) نے انتخاب فرمائے ہیں۔ اور انکو حضرت مولانا محمد زبیر صاحب (فاضل جامعہ دارالعلوم الاسلام لاہور 2023) نے تحریر فرمایا ہے ۔
یہ ملفوظات آپ ہماری ویب سائٹ
https://readngrow.online
پر بالکل مفت میں پڑھ سکتے ہیں ۔
براہ مہربانی یہ پوسٹ اپنے واٹس ایپ اور دیگر سوشل میڈیا پر شئیر کریں ۔